Ruta “No P.N. Peneda-Gerês, os Bosques da envolvente do Mouro” 20 de setembro, Lamas de Mouro (Portugal)

“Esta tarde, nos albores do Equinoccio de outono, libereime de compromisos e atendinme. Meus cánidos, comigo.
A terra negra, solta, cuberta pola follascas, o chan mol. Onde ir? Agora sei que non era importante a pregunta. Os cánidos corren, olfactean, esburacan o chan, besbellan entre eles. Advirto a súa ledicia. E eu?
Aínda non; prenden en min pensamentos rutineiros, problemas cos que me recreo; ideas que inquedan. Estou afastada dos meus sentidos e iso que me cingue un lugar fermoso. Así e todo, a voluptuosidade da envolvemente do Mouro prende en min e xa deteño os ollos nos liques Usneas dos carballos e nas súas longas barbas verdeazuladas. Nas poliñas delgadas, hai cecidias, bugallos a piques de caer. Landras e abelás caen e baten con entusiasmo no chan.
Vou perdendo a présa e o camiño desdebúxase. E deixei de pensar ante inmensa curvatura dos gumes afiados das montañas, alí onde as uces, carqueixas e carrouchas. O río Mouro, vai tapizado por violas e esfagnos. E por fin, tal como no fermoso campo dos Asfodelos de Perséfone, abríuse diante de nós a chan dos bidueiros abrancazados. Alí, entre eles, abrigueime co corpo e parei.”

MÁIS INFORMACIÓN E INSCRICIÓN LOGO DAS FOTOGRAFÍAS.

INDICACIÓNS
–Localización. Lamas de Mouro (Portugal)
–Lonxitude do paseo. 11km.
–Altitude. 900m-1000m
–Dificultade. Baixa.
–Hora de comezo. 11h.
–Hora de remate. 17h, aproximadamente.
–Xantar. Cadaquén levará o seu alimento.
O transporte realizarase en coches. Quen non teña, pode sumarse a outros coches.
INSCRICIÓN